Ilka year the 25th Januar merks the warlwide celebration o the warks o Rabbie Burns, the maist weel kent o aa screivers in the Scots leid. Bit in the cauld Januar morn o the nicht afore, whit is the future o Scots?
Ower the coorse o 2021-23 a new collaborative projeck heidit bi the University of Glasgow an supportit bi the Royal Society of Edinburgh is ettlin at finnin a repone tae thon important speirin. Whiles mair nor 1.5 milion fowk in Scotland yaise or hae some kennin o Scots, thair’s nae coherent research agendae oan leid policy an plannin fir the leid.
The University of Glasgow haes pairtnert wi Oor Vyce an Education Scotland fir tae gaither thegither the vyces o sindry fowk fae a braid rynge o backgroons thit wad lik tae mak positive chynge fir the Scots leid. The research will gaither ideas fae the public, examine thaim in mair detail at stakehaudder warkshoaps, an tak thaim tae a final symposium thit cin big up consensus oan the future o Scots.
Fir tae set the agendae, we’r speirin fowk fae ower Scotland (whither Scots spikkers or no) gin they’ll tak 5–10 meenits tae share hoo they thaimsels see the future o Scots.
